उनले प्रधानमन्त्री ओलीलाई १२ वटा प्रश्न अघि सार्दै सडकमा देखिएको असन्तुष्टिको कारण राजाकोजस्तै राष्ट्रपतिको तामझाम भएको बताए। पौडेलले प्रधानमन्त्री ओलीले संविधानको मर्म नबुझेको भन्दै आफन्त र आफ्ना मन्त्रीहरुको भ्रष्टाचार काण्डको बचाउ गरेकोमा पनि आलोचना गरे । “मन्त्रीहरुको भ्रष्टाचारको ढाकछोप आफैं अघि सरेर गर्नुभयो । देशमा भ्रष्टाचारको बिगबिगी छ । तर, ठूला भ्रष्टाचार काण्ड चलाउन नसक्ने अवस्थामा अख्तियार पुगेको छ । अदालत पनि प्रभावमा पारिएको जस्तो देखिन्छ,” उनले बैठकमा भने ।

कांग्रेस वरिष्ठ नेता पौडेलले प्रधानमन्त्री ओलीको भूमिका समन्वयकारी नभएको, संवैधानिक आयोगमा ३९ पद रिक्त राखेको, स्वतन्त्रता विरोधी आम सञ्चार विधेयक ल्याएको र आफूलाई मंसिर १७ गते दमौलीमा किन पक्राउ गराएको भन्दै प्रश्न गरेका थिए । त्यस्तै उनले प्रधानमन्त्री ओलीले भारतलाई चिढ्याएको बताउँदै भने, “अयोध्या माडीमा पर्छ जस्ता कुरा भनेर भारतलाई चिढ्याउन कुरा किन गर्नुभयो ? त्यस्ता कुरालाई थुमथुम्याउन फेरि के कस्तो तहमा ओर्लेर मेहनत गर्नुपर्यो ? त्यसले हाम्रो गरिमा कति बढाउने घटाउने गर्यो ?”

नेता पौडेलले संसद बैठक छिटो बलाउन माग गर्दै संसदबाटै प्रतिगामीहरुको धज्जी उडाउने बताएका थिए ।